Кастусю Каліноўскаму

Будаўнікам Дома культуры імя Кастуся Каліноўскага ў Гарадку прысвячаю.

З бацькоўскай вёскі Мастаўляны,
Мо' і не раз праз Гарадок
Ішоў з наборам палымяным
"Мужыцкай праўды" ў Беласток.

Складаў з вялікаю адвагай
Свае бунтарскія радкі,
Распальваў сэрцы пад сярмягай —
Ішлі змагацца дзецюкі.

Ішлі на панскія палацы,
За пот, за голад, мазалі.
Ішлі свабоды дамагацца,
Хлеба працоўным і зямлі.

За незалежныя краіны,
За Польшчу і за Беларусь,
За дарагі народ загінуў
Ў няроўнай барацьбе Кастусь.

Аддаў жыццё за наша шчасце,
За волю, роўныя правы.
Адкрыты нашы сэрцы насцеж —
У іх Кастусь заўжды жывы.